काठमाडौँ । प्रधानमन्त्री केपी शर्मा ओली र नेपाल कम्युनिस्ट पार्टीका महासचिव विप्लवबीच भेटबार्ता भएको छ। मंगलबार प्रधानमन्त्री निबास बालुवाटारमा प्रधानमन्त्री ओली र नेकपा महासचिव विप्लव र प्रवक्ता प्रकाण्ड्वीच देशको समसामयिक राजनीतिक आर्थिक बिषयमा कुराकानी भएको हो।
भेटघाटको क्रममा नेपाल कम्युनिस्ट पार्टीका महासचिव विप्लव सी र प्रवक्ता प्रकाण्ड सीले प्रधानमन्त्री केपी शर्मा ओलीको आसन्न चीन भ्रमणको सफलताको लागि सुभकामना दिदै चीन भ्रमणको क्रममा देश र जनहितको बिषयमा द्विपक्षीय कुराकानी गर्न सुझाव दिएका थिए।
भेटवार्तामा नेकपाको तर्फबाट तीन बुँदे सहमति कार्यन्वयनमा ढिलाई नगर्न र तीन बुँदे सहमति बिपरित पछिल्लो समय गिरफ्तार परेका नेकपाका कार्यकर्तालाई तत्काल रिहा गर्न आग्रह समेत गरिएको छ भने प्रधानमन्त्री केपी शर्मा ओलीले सरकार र नेकपाबिच बिगतमा भएको तीन बुँदे सहमति कार्यन्वयनमा सरकार दृढ भएको बताउदै छिटै टुङ्गोमा पुर्याउने बताएका थिए । उनले चीन भ्रमण सकेर फर्केपछि यस बिषयमा थप छलफल गर्ने समेत बताएको बुझिएको छ।
यसैगरी कुराकानीको क्रममा दुई पार्टीबीचको सहकार्यलाई अघि बढाउने बिषयमा समेत छलफल भएको बताइएको छ।
