समाचार

विश्वका कम्युनिष्टले हामीबाट शिक्षा लिएका छन्- प्रधानमन्त्री ओली

प्रधानमन्त्री केपी शर्मा ओलीले पार्टी एकतालाई जोगाइराख्न कार्यकर्तालाई आग्रह गरेका छन्। साविकका एमाले र माओवादी एकता धेरै शक्तिका लागि नमुना बनेको भन्दै उनले आफुहरुबाट विश्वका कम्युनिष्ट र प्रगतिशिल आन्दोलनले पाठ लिएको दाबी गरे।

‘इतिहासका फरक– फरक धारलाई एउटै ठाउँमा ल्याएर एउटै पार्टी बनाएका छौँ’ उनले भने, ‘विश्वका कम्युनिष्ट प्रगतिशील, देशभक्तिपूर्ण आन्दोलनहरुले हामीबाट शिक्षा लिएका छन्।’

माओवादी द्वन्द्वको रुपान्तरण पनि विश्वका लागि नमुना भएको उनले बताए। ‘हामीले द्वन्द्वलाई मौलिक ढंगले व्यवस्थापन गरेर शान्ति प्रक्रिया सफलताको अन्तिम विन्दुमा छौँ’, ओलीले भने, ‘यो दुनियाको लागि नमुनाको विषय हो।’

भुटानी शरणार्थी समस्या समेत तेस्रो देशमा व्यवस्थापन गरेर नमुना पेश गरेको उनले जिकिर गरे। नेपालमा रहेका भुटानी शरणार्थी तेस्रो मुलुक अर्थात अमेरिका स्थानान्तरण भएका छन्।

प्रतिक्रियावादीले जनताको शक्तिलाई पराजित गर्न नसक्ने बताउँदै उनले भने ‘सचेत, संगठित र शान्तिपूर्ण जनदबाबबाटै परिवर्तन ल्याउन सकिन्छ।’
उनले कार्यकर्तालाई उच्च मनोबलका साथ अगाडि बढ्न समेत आग्रह गरे।

लोकतान्त्रिक विधि र प्रक्रियाबाट अघि बढ्न खोज्दा प्रतिक्रियावादीले विगतमा बाटो छेकेको उनले बताए। ‘आफूले जित्नुपर्छ, आफूले नजितेपछि अलोकतन्त्र भइहाल्छ, अधिनायकवाद भइहाल्छ भन्नु प्रतिक्रियावादको परिभाषा हो’ उनले भने।

मञ्चमा बसेर झण्डै डेढघण्टा लामो प्रशिक्षण मन्तव्य राखेकाका प्रधानमन्त्री ओलीले अधिकाँश समय भने सरकारको बचाउमा खर्च गरेका थिए। उनले सरकारले शिक्षा, स्वास्थ्य, उर्जा, विकास निर्माणमा धेरै काम गरिरहेको बताएका थिए।

Related Articles

Back to top button
Close